နိုင်ငံကူးလက်မှတ် လျှောက်ထားသည့် စနစ်ပြောင်း

နိုင်ငံကူးလက်မှတ် လျှောက်ထားရာတွင် ယခင်ထက် ပိုမို အချိန်ကုန် သက်သာပြီး မြန်ဆန်စွာ ပြုလုပ်နိုင်ရန် လျှောက်ထားမှု စနစ်ပုံစံကို ဧပြီလ ၂၂ ရက်နေ့မှ စတင်ပြောင်းလဲ ကျင့်သုံးနေကြောင်း မြန်မာနိုင်ငံကူးလက်မှတ် ထုတ်ပေးရေးရုံးမှ တာဝန်ရှိသူတစ်ဦးက ပြောကြားသည်။

“အခုက တစ်ဆင့်ချင်းစီ ပြုလုပ်ရတဲ့ ပုံစံမျိုး ပြောင်းထားပါတယ်။ အရင်ကလို ဘဏ်မှာ ဘောက်ချာတွေ၊ စာရွက်တွေ မဖြည့်ရတော့သလို လျှောက်လွာကိုလည်း အရင်စာမျက်နှာ ငါးမျက်နှာလောက် ဖြည့်ရမယ့်အစား အခု တစ်မျက်နှာပဲ ဖြည့်ရတော့မှာပါ” ဟု ၎င်းကဆိုသည်။

အဆိုပါ နိုင်ငံကူးလက်မှတ်ရုံးတွင် အမှတ်စဉ်ပါ လျှောက်လွှာကို ဝယ်ယူ ဖြည့်ရမည် ဖြစ်ပြီး အလှည့်ကျ ခေါ်ယူမှုကို စောင့်ဆိုင်းပြီးနောက် အလှည့်ကျပါက လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေး ဦးစီးဌာန ကောင်တာတွင် သန်းခေါင်စာရင်း၊ နိုင်ငံသားစိစစ်ရေး ကတ်ပြားကို စိစစ်ခြင်း၊ ဘားကုတ် ပါရှိသော စလစ် ထုတ်ယူခြင်း၊ စလစ်ဖြင့် ဘဏ်တွင် ငွေသွင်းခြင်းတို့ကို တစ်နေရာတည်းတွင် အပြီး ဆောင်ရွက်ပြီး ဓာတ်ပုံရိုက်ခြင်းကို နောက်ဆုံး ဆောင်ရွက်ခြင်းဖြင့် နိုင်ငံကူးလက်မှတ် လျှောက်ထားသည့် အစီအစဉ် ပြီးဆုံးကြောင်း ၎င်းကဆိုသည်။

ယခုကဲ့သို့ စနစ်ပြောင်းလဲ ထားခြင်းကြောင့် ယခင်ထက် ပိုမို ကြာမြင့်သည်ဟု ဆိုကြောင်း၊ ယခင်က တန်းစီရကာ ယခုမူ လျှောက်လွှာပါ အမှတ်စဉ်ဖြင့် လုပ်ဆောင်ရသောကြောင့် လျှောက်ထားသူများ နံပါတ်စဉ်အလိုက် စောင့်ဆိုင်းရသဖြင့် စုပုံနေကြောင်း နိုင်ငံကူးလက်မှတ် လာရောက်ပြုလုပ်သူ အချို့က ပြောကြားသည်။
“အခု လက်မှတ်ရဖို့အတွက် နှစ်ရက်လောက် လုပ်လိုက်ရတယ်။ လုပ်တဲ့စနစ် ပြောင်းလိုက်တော့ လူတွေ အုံပြီး ပိုကြာတယ်။ နောက်ပြီး ညနေဆို ဒီအတိုင်း ပြန်တန်းစီနေရတယ်” ဟု ၎င်းတို့က ဆိုသည်။

ယခင်က သက်တမ်းတိုးသူများ အနေနှင့် တိုက်ရိုက်တန်းစီပြီး ဝင်ရောက် သက်တမ်းတိုးနိုင်သော်လည်း ယခုအခါ လူများ စုပြုံနေသောကြောင့် လုပ်ငန်းဆောင်ရွက်ရန် အဆင်မပြေကြောင်း နိုင်ငံကူးလက်မှတ် သက်တမ်းတိုးသူ အမျိုးသမီးတစ်ဦးက ပြောကြားသည်။

လူဝင်မှုကြီးကြပ်ရေးနှင့် အမျိုးသားမှတ်ပုံတင် ရေးဦးစီးဌာန ကောင်တာတွင် စစ်ဆေးသည့် သန်းခေါင်စာရင်း၊ နိုင်ငံသားစိစစ်ရေး ကတ်ပြားတို့ကို စိစစ်ရာတွင်သာ အနည်းငယ် အချိန်ကြာမြင့်မည် ဖြစ်ပြီး စနစ်သစ်ဖြစ်၍ အသစ် လျှောက်ထားသူများ၊ သက်တမ်းတိုးသူများ အနေနှင့် အနည်းငယ် အခက်အခဲ ရှိသေးသဖြင့် ယခင်ကထက် ကြာမြင့်သည်ဟု ထင်နေခြင်း ဖြစ်ကြောင်း မြန်မာနိုင်ငံကူးလက်မှတ် ထုတ်ပေးရေးရုံး တာဝန်ရှိသူတစ်ဦးက ဆိုသည်။

နိုင်ငံကူးလက်မှတ် ပြုလုပ်ရာတွင် စာအုပ်ဖိုး နှစ်သောင်းကျပ်၊ ဆေး၊ မင်နှင့် ပြုပြင်ထိန်းသိမ်းခ တစ်ထောင်ကျပ်၊ လျှောက်လွှာကြေး ၂၀၀ ကျပ်၊ ဓာတ်ပုံကြေး ၂၀၀၀ ကျပ်၊ ပစ္စည်း ဝန်ဆောင်ခတို့ ၁၈၀၀ ကျပ် စုစုပေါင်း ကျပ် ၂၅,၀၀၀ ကုန်ကျမည် ဖြစ်ကြောင်း ယင်းဌာနထံမှ သိရသည်။

The Voice Weekly

Posted in: သတင်း